கைக்குட்டை

கைக்குட்டையை பரிசளித்தால்
உறவு நிலைக்காதாம்
மூட நம்பிக்கை என்று தான்
நம்பியிருந்தேன்

ஆனால் அது உண்மை தான்
போலிருக்கிறது

நீ பரிசாய் தராவிட்டாலும்
உன் கைக்குட்டை என்னிடம்
வந்த பிறகு
நம் எந்த உறவுமே
நிலைக்கவில்லையே

யாரோவாய் இருந்த நீ
என் தோழி ஆனாய்
தோழியாய் இருந்த நீ
என் காதலி ஆனாய்
காதலியாய் இருந்த நீ
என் மனைவியும் ஆனாய்
மனைவியை இருந்து
தாயும் ஆனாய்
என் மகனுக்கு மட்டுமல்ல
எனக்கும் தான்

இன்று எனக்குள் மாற்றம்
தந்தவளே நீ இன்னமும்
மாறிக்கொண்டே இருக்கிறாய்
இல்லையில்லை
ஓர் நிலையிலிருந்து
இன்னொரு நிலைக்கு
உயர்ந்து கொண்டு இருக்கிறாய்
இருப்பாய்

இவையெல்லாம்,
எதேற்சியாய் நீ விட்டுச்சென்று
என்னிடம் கிடைத்த
கைகுட்டையின் மகிமையா?
இல்லை நான் மட்டுமே
காணும்படி எழுதிய உன்
கடிதமாய் அதில் வீசும்
உன் வாசனையின்
அற்புதமா??

தெரியவில்லை, ஆனாலும்
அதை நான் இன்னமும்
பத்திரப்படுத்தி வைத்திருக்கிறேன்
உனக்கே தெரியாமல்...